Həyatımın hər anında,
Bax elə indi də
Qulaqlıqlardan ruhuma axan
Musiqidə də.
Gözlərimdən içimə süzülən
Rənglərdə də,
Baxışlarda da,
Əllərimdən qəlbimə yol alan
Toxunuşlarda da,
Bu yağışlarda da,
Səndən nəsə var.
Hər ümiddə,
Ümidlərimə gor qazan,
Hər kədərdə,
Kədərimi alt-üst edən
Hər sevincdə,
Ətrinin bir damcısını belə
Qısqandığım bu şəhərdə,
Bu səhərdə, həndəvərdə
Səndən nəsə var.
Səndə nəsə var.
İzlənməyən bir kanalda
yayımlanan filmdim mən.
Bitdim artıq,
Bağışlayın.
Tanımadığınız bir yol var,
Kənarında
tərpənməyən ağacdım mən.
Getdim artıq,
Bağışlayın.
Sınmış bir körpü önündə durdum.
Səhv eləməkdən qorxurdum.
Etdim artıq,
Bağışlayın.
Yaman sıxılır ürəyim
Partlayış olacaq sanki
Bu FHN hara baxır?
Yaman qırılıb ürəyim
Bədənim çökəcək sanki
Bu FHN hara baxır?
Fikirlərimi alıblar,
Qəlbimi də qoparıblar,
FHN-i başa düşdük,
Bəs, MTN hara baxır?
